Kaimu Mkurugenzi Mkuu wa Shirika la Maendeleo ya Viwanda Vidogo (SIDO), CPA Ahmed Kitara, ametembelea Ofisi ya SIDO Mkoa wa Tanga, ambapo amefanya mazungumzo na wawakilishi wa EACOP ( Bomba la Mafuta Ghafi la Afrika Mashariki) na Sheria Kiganjani kuhusu namna ya kuimarisha na kuendeleza mahusiano ya kimkakati katika kuwawezesha wajasiriamali na kukuza uanzishwaji wa viwanda vidogo katika maeneo yanayopitiwa na Bomba la Mafuta Ghafi la Afrika Mashariki.

Katika mazungumzo hayo, CPA Kitara alisisitiza umuhimu wa kutumia fursa zinazotokana na uwepo wa mradi wa EACOP kuwa kichocheo cha maendeleo ya kiuchumi kwa wananchi, hususan vijana, wanawake na wajasiriamali wadogo wanaoishi katika maeneo yanayopitiwa na bomba hilo.

Ushirikiano kati ya SIDO, EACOP na Sheria Kiganjani unalenga kuweka mazingira wezeshi kwa wananchi kuanzisha na kuendeleza shughuli za uzalishaji kupitia teknolojia, ujuzi, ubunifu, ushauri wa biashara, uongezaji thamani wa malighafi za ndani na upatikanaji wa masoko. Hatua hiyo inaweza kusaidia kuongeza idadi ya viwanda vidogo vinavyozalisha bidhaa zinazokidhi mahitaji ya soko na fursa zinazotokana na shughuli za kiuchumi zinazozunguka mradi wa EACOP.

Aidha, SIDO inaweza kutumia utaalamu wake katika uchaguzi na uhamishaji wa teknolojia zinazofaa, mafunzo ya ujasiriamali na uzalishaji, ubunifu wa bidhaa, uboreshaji wa ubora, ufungashaji na uwekaji wa nembo, pamoja na kuwaunganisha wajasiriamali na taasisi zinazoweza kuwasaidia kupata mitaji na masoko.

Kwa upande wa EACOP, ushirikiano huu unaweza kuongeza fursa za kuwaunganisha wajasiriamali wa maeneo yanayopitiwa na bomba na shughuli za kiuchumi zinazozunguka mradi, huku Sheria Kiganjani ikichangia katika kuwawezesha wananchi kupata uelewa na msaada unaohusiana na masuala ya kisheria na mazingira ya kufanya biashara.

Katika hatua hiyo, SIDO Mkoa wa Tanga inatarajiwa kushirikiana na wadau hao kufanya utambuzi wa fursa za biashara na viwanda vidogo katika maeneo yanayopitiwa na bomba, kubaini mahitaji ya teknolojia na ujuzi, pamoja na kutengeneza programu za kuwawezesha wananchi kutumia fursa hizo kwa tija na kwa kuzingatia mahitaji ya soko.

Ushirikiano huo unaakisi dhamira ya SIDO ya kuunganisha teknolojia, ujasiriamali, ubunifu na fursa za uwekezaji ili kuchochea uanzishwaji na ukuaji wa viwanda vidogo nchini. Kwa kufanya kazi kwa pamoja na wadau wa kimkakati kama EACOP na Sheria Kiganjani, fursa zinazotokana na miradi mikubwa zinaweza kugeuzwa kuwa chachu ya ajira, kuongeza kipato cha wananchi, kukuza thamani ya malighafi za ndani na kuimarisha maendeleo ya viwanda katika ngazi za jamii.