Shirika la Maendeleo ya Viwanda Vidogo (SIDO) limeendelea kuunga mkono wabunifu wa Kitanzania kwa kutoa ushauri wa kitaalamu kwa kijana Godfrey Issack Issagya ili kuboresha na kuendeleza mashine ya kuangulia mayai ya kuku (Incubator) aliyoibuni.
Hatua hiyo inalenga kuhakikisha wafugaji wa kuku nchini wanapata vifaranga kwa urahisi, kwa wakati na kwa uhakika, kupitia matumizi ya teknolojia zinazobuniwa na kuzalishwa ndani ya nchi.
Katika kumwezesha mbunifu huyo, SIDO imetoa ushauri wa kitaalamu unaohusisha maeneo mbalimbali, ikiwemo teknolojia kwa lengo la kuongeza ufanisi, ubora na uwezo wa mashine hiyo katika kuangua mayai. Aidha, SIDO imetoa ushauri kuhusu masoko ili kuwezesha bidhaa hiyo kufikia wateja wengi zaidi na kuongeza wigo wa matumizi yake.
Vilevile, SIDO inaendelea kumwezesha mbunifu huyo kwa kumuunganisha na wadau muhimu wanaoweza kutoa fursa za ushirikiano, uwekezaji na maendeleo zaidi ya teknolojia hiyo, ili kuifanya bidhaa hiyo kuwa na ushindani katika soko.
Ubunifu huu ni hatua muhimu katika kukuza matumizi ya teknolojia zinazozalishwa nchini, kuongeza thamani ya mawazo ya wabunifu wa Kitanzania na kufungua fursa za ajira na uwekezaji kwa vijana. Pia, una nafasi ya kuchangia kupunguza utegemezi wa taifa katika kuagiza mashine za kuangulia mayai kutoka nje ya nchi.
Kwa upande wa sekta ya ufugaji wa kuku, upatikanaji wa mashine bora za kuangulia mayai zinazotengenezwa ndani ya nchi unaweza kuwawezesha wafugaji kupata teknolojia kwa urahisi zaidi na hivyo kuimarisha shughuli zao za uzalishaji.
Kupitia jitihada hizi, SIDO inaendelea kutekeleza dhamira yake ya kuhamasisha ubunifu, kuendeleza teknolojia za ndani na kuwawezesha wabunifu wa Kitanzania kubadilisha mawazo yao kuwa bidhaa na huduma zenye tija kiuchumi.
Hatua hii inaonesha umuhimu wa kuwekeza katika ubunifu wa vijana kama moja ya nyenzo za kukuza viwanda vya ndani, kuongeza ajira, kuimarisha sekta za uzalishaji na kuchochea maendeleo ya uchumi wa taifa.

