SANVN Viwanda Scheme ni mpango wa uwezeshaji wananchi kuichumi ili kukabiliana na changamoto mbalimbali za uanzishaji na uendelezaji viwanda vidogo na vya kati katika maswala mazima ya upatikanaji wa ujuzi, masoko na mitaji. Walengwa wa mpango huu ni wajasiriamali wadogo na wa kati wenye viwanda wanao jishughulisha na uzalishaji wa bidhaa mbalimbali ili kuongeza mnyororo wa thamani.
Mpango huu unaratibiwa na taasisi tano ambazo ni SIDO, Benki ya AZANIA, NSSF, VETA NA NEEC (SANVN). SANVN Viwanda scheme inatoa mikopo kwa ajili ya uwezeshaji viwanda kwa wajasiriamali wadogo (milioni 8 hadi milioni hamsini 50) na wajasiriamali wa kati (million 50 hadi milioni mia tano 500). Riba ya mikopo hii ni asilimia 13 na inatolewa na SIDO kupitia ofisi zote za mikoa zilizopo Tanzania bara.
Ili wajasiriamali wengi waweze kunufaidika na mfuko huu, kiwango cha riba ni kidogo sana ukilinganisha na watoa huduma nyingine za kifedha. Kupitia maonesho mbalimbali yanayofanywa na SIDO na hasa maonesho ya 4 ya SIDO Kitaifa - Njombe, wajasiriamali wengi walionekana kuvutiwa na mfuko huu kwa kuwa unatoa kiasi kikubwa cha fedha na riba yake ni ndogo. Pia wajasiriamali hawa waliongezea kuwa, vigezo na masharti ya mfuko huu ni rahisi kukidhi ili kuweza kukopesheka.
Mikopo ya SANVN Viwanda Scheme imegawanyika katika makundi mawili ambayo ni Mikopo ya uwekezaji/mashine, mitambo, (investment loan) na hutolewa kwa ajili ya ununuzi wa mashine/mitambo ili kuanzisha/kuendeleza viwanda vidogo au vya kati. Aina ya pili ni mikopo isiyo ya kiuwekezaji (working capital loan). Hii ni mikopo itolewayo kwa lengo la kuwezesha shughuli za kiutendaji za kila siku mfano ununuzi wa malighafi, vifungashio, matangazo na gharama zingine za uendeshaji Viwanda
